Бүгэдэ Оросой мэргэжэлтэ «Түрэл хэлэнэй болон түрэл уран зохёолой эрхим багша» мүрысөөндэ шүүгшэ боложо хабаадаһан Тыва Уласай эрдэмтэн, «Үндэһэн һургуули хүгжөөлгын институт» гэһэн гүрэнэй бюджедэй эрдэмэй эмхи зургаанай захирал, хэлэ бэшэгэй эрдэмэй дид-доктор Елена Куулар «Бэлиг» түб руу айлшалаа.
Хүршэ уласһаа хүрэжэ ерэһэн айлшан түбэймнай ажаябуулгатай танилсаха зуураа толгойлжо ябаһан институдайнгаа ажал тухай тобшохоноор хөөрэһэн байха юм.
Заха хизааргүй сахим юртэмсын гүндэ түрэл хэлэнүүдэйнгээ төөрин үгы болошохогүйн тула оролдон ябуулжа байһан ажалайнгаа дүй дүршэлөөр уулзалгын үедэ таланууд хубалдаа. Тиихэдээ хоёр уласай эмхи зургаануудай ажал ехэнхи удхаараа адли байна гэжэ онсолон тэмдэглээ.
— Нютаг можонууд хоорондын «Сибириин хэлсээн» эблэлэй Болбосоролой болон эрдэм ухаанай талаар харгалзалгын зүблэлэй дэргэдэ дүрбэн жэлэй саана байгуулагдаһан Сибириин болон Алас Дурнын арадуудай түрэл хэлэнүүдэй талаар Ажалай бүлэгтэ Елена Мандан-ооловнатай хамта ажалладагбди. Мүнөө сагта түрэл хэлэнүүдые зааха, һуралсалай түсэбүүдые табиха асуудалнуудаар, юрэдөөл, хэлэнэй бодолгын олон зүйлөөр хоорондоо ходо харилсаатай байдагбди. Үдэр бүриин ажалда иимэ холбоо харилсаан айхабтар туһатай юм, — гээд Улас түрын «Бэлиг» түбэй захирал Баир Балданов онсолоо.
Түүрэг түрэлэй түүхэтэ арадуудай анхан сагһаа эзэлжэ һуурижаһан үргэн ехэ дэбисхэрэй зүүн-урда захаһаа бууһан айлшанаа «Бэлиг» түбэйхид ууган заншалаа сахин, халуун сайгаараа угтажа, гарай багахан бэлэг барюулаад үдэшэһэн байна.
