Буряадай суута ирагуу найрагша Мэлс Самбуевай нэрэмжэтэ уран зохёолой шангуудые барюулгын баяр ёһолол мүнөөдэр, уран шүлэгшын түрэһөөр тэбхэр 85 жэлэй ойн баярай үдэр, Буряад Уласай Үндэһэтэнэй номой санда үнгэргэгдөө.
Буряад Уласай соёлой сайд Соёлма Дагаева, болбосоролой болон эрдэм ухаанай сайдай орлогшо Батор Буянтуев, уласай Уран зохёолшодой холбооной түрүүлэгшэ Сергей Доржиев, Захааминай аймагай засаг даргын орлогшо Евгений Цыбенов, Захааминай түб номой сангай захирал Лариса Ардаева гэгшэд баяр ёһололой эхиндэ амаршалгын үгэнүүдые хэлэжэ, сугларагшадые, мүрысөөндэ илагшадые амаршалаа. Улас түрын «Бэлиг» түбэй захирал Баир Балданов тус хэмжээ ябуулга хүтэлжэ хабаадаба.
2023 ондо түрүүшынхиеэ үнгэргэгдэһэн энэ мүрысөөн хүүгэдэй поэзиин шэглэлээр эмхидхэгдээ һэн. Мэлс Самбуевай нэрэмжэтэ Захааминай аймагай түб номой сангай тэрэниие үнгэргэхэ тухай үүсхэл Буряад Уласай Болбосоролой болон эрдэм ухаанай яаман, Улас түрын «Бэлиг» түб дэмжээ һэн гээд һануулха хэрэгтэй. Буряад хэлэ сахин хүгжөөлгын гүрэнэй программаар хараалагдаһан мүнгэн гаргашалагдажа, үхибүүдтэ зорюулжа бэшэдэг томошуулые, мүн баһа гуурһа туршажа ябаһан эдиршүүлые урмашуулгада һомологдодог юм.
Энэ удаа эмхидхэгдэһэн хоёрдохи мүрысөөн шэнэ нэрэнүүдые элирүүлхынгээ хажуугаар, мэдээжэ ирагуу найрагшыншье, багшын ажалай ветерануудайшье зохёохы ажалтай танилсуулаа.
Томошуулай дунда «Хүүгэдтэ зорюулагдаһан шүлэг» гэһэн шэглэлэй «Богони зохёол» хэсэгтэ мэдээжэ ирагуу найрагша Эрдэни Дугаров илалта туйлажа, 10 мянга түхэриг шанда, бэлэг сэлэгтэ хүртөө. Энэл шэглэлэй «Шүлэгүүдэй үлхөө» гэһэн хэсэгтэ багшын ажалай ветеран Должид Ванчижуй, «Шүлэгүүдэй суглуулбари» хэсэгтэ багшын ажалай ветеран, эрдэмэй дид-доктор Алла Эрдынеева илалта туйлажа, тус тустаа 15, 20 мянган түхэригөөр, гарай бэлэгүүдээр, баталамжа бэшэгүүдээр урмашуулагдаа.
«Жэлэй эрхим шүлэг» гэһэн шэглэлээр диилэнхи олон хүүгэд Захааминай аймагай һургуулинуудһаа хабаадаһан байжа, энэ һарын 21-нэй үдэр аймагайнгаа түбтэ үнгэргэгдэхэ баяр ёһололдо шангуудаа абаха юм. Дээдын шан – Гран-придэ хүртэһэн эдир ирагуу найрагша, Ехэ-Сахирай дунда һургуулиин 8-дахи ангиин һурагша Номина Будаевагай нэрэ мүнөөдэр онсолон тэмдэглэгдээ һэн.
Яруунын аймагай Эгэтын-Адагай дунда һургуулиин 8-дахи ангиин һурагша Соёлма Доржиевагай эгэшэдэ урмашуулгын шангынь дамжуулагдаа.
Хэмжээ ябуулгын хоёрдохи хахадта ирагуу найрагшын түрэлхидэй, үетэн нүхэдэйнь зүгһөө түлөөлэгшэд үгэ хэлээ, суута поэдые һайхан үгэнүүдээр һанан дурсаа.
Мүн тиихэдэ бэлигтэй ирагуу найрагша Николай Шабаев, Буряадай гүрэнэй телевидениин мэдээжэ сэдхүүлшэн Дарима Жамсоева, дүршэл ехэтэй найруулагша Зэгзэма Самбуева гэгшэдэй суг ажалтантаяа хамта зохёон бүтээһэн баримтата фильм сугларагшадай анхаралда дурадхагдаа. Мэлс Самбуевай намтар тухай һонирхолтойгоор хөөрэн харуулагдахын хажуугаар, энэ фильм дотор тэрэнэй өөрынь уншажа, миндаһан дээрэ бэшүүлһэн зохёол зэдэлээд, «Адуушанай дуун», «Эжын түрэһэн газарта» болон бусад мэдээжэ дуунуудай шүлэг зохёогшо, суута ирагуу найрагшатай уулзаһан мэтээр үзэгдөө һэн.
