«Буряад хэлэнэй синтаксис: дидактическа материалнуудай согсолбори» гэhэн ном «Бэлиг» түбтэ бэлдэгдэжэ, үнгэрһэн жэлэй эсэстэ нара хараба.
Зохёон согсолборилогшодынь — «Бэлиг» түбэй захиралай орлогшо, хэлэ бэшэгэй эрдэмэй дид-доктор Оюна Забанова, Түнхэнэй аймагай Зуун-Мүрэнэй дунда hургуулида 40 гаран жэлэй туршада ажаллаhан буряад хэлэнэй багша, Ажалай Улаан Тугай орденоор шагнагдагша, «Буряад Уласай болбосоролой хүгжэлтэдэ горитой хубитаяа оруулhанай түлөө» гэhэн медальда хүртэһэн багшын ажалай ветеран Мария Шобоева, Доржо Банзаровай нэрэмжэтэ Буряадай гүрэнэй ехэ hургуулиин буряад хэлэнэй болон зааха онол аргын тэнхимэй доцент, «Бэлиг» түбэй ахамад мэргэжэлтэн, hурган хүмүүжүүлгын эрдэмэй дид-доктор Оксана Дареева.
5-9-дэхи ангинуудта хэрэглэгдэхэ энэ ном дотор дабталгын даабаринуудые, зохёохы шанартай дасхалнуудые, тестнүүдые олохот. Эдэ даабаринууд шэнэлэгдэhэн стандартнуудта таарамжатайгаар зохёогдонхой гэжэ тэмдэглэлтэй.
Буряад хэлэнэй синтаксис зааха үедөө hурагшадай мэдэсэ бэхижүүлхын, шалгахын тулада энэ номой hонирхолтой олон янзын даабаринуудые багша хэшээлдээ хэрэглэхэ аргатай.
Согсолборидо ороһон дидактическа материал буряад хэлэнэй дээдэ гарай мэдээжэ багша Мария Шобоевагай баян дүршэлэй дээжэһээ абтажа, үндэһэн буряад уран зохёолой зүйлнүүд дээрэ, «Буряад үнэн» сониндо, «Байгал» сэдхүүлдэ хэблэгдэhэн материалнууд дээрэ үндэhэлhэн байна.
Оросой Холбоото Уласай Гэгээрэлэй яаманай мэдэлэй болбосорол хүгжөөлгын гол бодолой хүреэлэнэй захилаар бэшэгдэһэн энэ номой хэб Улас түрын «Бэлиг» түбтэ бэлдэгдэһэн юм. «Буряад Уласта буряад хэлэ сахин хүгжөөлгэ» гэhэн гүрэнэй программын тэдхэмжээр барлагдаа. Һаяын сагта уласай болбосоролой эмхи зургаануудаар тараагдаха гэжэ мэдүүлэе.
