Буряадай радиогой «Сэхэ руунь хэлсэе» гэһэн дамжуулгада «Бэлиг» түбэй захирал Баир Балданов хабаадаа.
Агаарай долгиндо шууд сэхэ гаража байдаг мэдээжэ энэ дамжуулгын автор ба хүтэлэгшэ Ольга Намдаковатай буряад хэлэнэй габшагай һарын ябаса тухай хөөрэлдэбэд.
Мүн тиихэдэ Буряад Уласай Толгойлогшын дэргэдэхи буряад хэлэнэй талаар комиссиин һаяхана үнгэргэгдэһэн ээлжээтэ зүблөөн дээрэ абтаһан шиидхэбэринүүд тухай мүн лэ сэхэ руунь хэлсэбэ.
— Буряад Уласай Болбосоролой болон эрдэм ухаанай сайд Валерий Поздняковой хэһэн элидхэлнүүдые комиссиин гэшүүдтэй зүбшэн хэлсээд, уласай толгойлогшо Алексей Цыденов одоол түүхэтэ шиидхэбэринүүдые абаа.
«Яндекс-оршуулагшада» буряад хэлэ оруулха ажал түргэдүүлхэ болонобди. «Бэлиг» түбтэмнай шэнэ таһаг нээгдэжэ, түрэл хэлэеэ тоо оньһото арга зүйгээр сахим юртэмсэдэ оруулха ажал бүри эршэтэйгээр ябуулагдахань.
Мүн тиихэдэ эхин ангинуудта буряад хэлээр һуралсалай зүйлнүүдые заажа эхилхэ тухай түүхэтэ шиидхэбэри абтаба. Эдэ бүгэдэ түрэл хэлэнэймнай хүгжэлтэдэ айхабтар ехэ нүлөө үзүүлхэ зэргэтэй, — гэжэ Баир Балданов тэмдэглэһэн байха юм.
