Улас түрын «Бэлиг» түб Буряадай Үндэһэтэнэй музейтэй хэлсээ баталжа, «Буддын шажанай соёл урлалай баялиг» гэһэн мэдээжэ үзэсхэлэндэ хабаатай бүхы мэдээсэл буряадшалба.
Тус үзэсхэлэн Орос гүрэнэй, Буряад ороной буддын шажанай түүхэдэ, урлалда зорюулагданхай юм. Эндэ суута уран барималша, лама Санжи-Цыбик Цыбиковэй болон Оронгын дархашуулай онсо шухаг бүтээлнүүд, Цам хатарай 100 гаран хубсаһан болон 70 гаран баг дэлгээтэй. Гадна эрдэмэй ба урлалай гайхамшагта хүшөө болохо Түбэд эмнэлгын атласай хуудаһанууд ехэ һонирхол татадаг. Тиихэдэ Буддын шажанай бурхадай, сахюусадай зурагууд, хүрэгүүд болон бусад уран гоё, гүн удхатай, хэдэн зуун жэлэй түүхэ шэнгээһэн бүтээлнүүд ехэ олон юм.
Тиин «Бэлиг» түбэй Гүрэнэй оршуулгын албанай мэргэжэлтэд буддын шажанай һургаалнууд тухай тайлбаринуудһаа эхилээд, манай гүрэндэ дэлгэрһэн түүхэ хүрэтэрнь нилээд олон мэдээсэл ород хэлэнһээ оршуулаа. Энэ ехэ ажал бэелүүлгэдэ Оросой эрдэмэй академиин Сибириин таһагай Монгол арадууд, буддын шажан болон Түбэд орониие шэнжэлэлгын хүреэлэнэй хүтэлэгшэ эрдэмтэн, хэлэ бэшэгэй эрдэмэй доктор, доцент, Буряад Уласай Толгойлогшын дэргэдэхи Буряад хэлэнэй комиссиин буряад хэлэнэй нэрэ томьёогой, бэшэгэй дүримэй ба газар уһанай нэрэнүүдэй талаар ажалай бүлэгэй хүтэлбэрилэгшэ Бабасан Цыренов аргагүй ехэ туһа хүргөө. Юуб гэхэдэ, буддын шажанай нэрэ томьёонуудтай бэшэлгэнүүдые оршуулхань ехэ орёо юм. Тиимэһээ тэдэниие олон хүнэй дабхар-дабхар уншажа, мэдэхэ зонтой зүбшөөд, заһаһанайнь удаа Бабасан Доржиевич түгэсхэлэй шалгалта хэһэн байна.
Буряадай Үндэһэтэнэй музейдэ дэлгэгдэһэн «Буддын шажанай соёл урлалай баялиг» гэһэн саг үргэлжын үзэсхэлэнэй зүйлнүүд тухай мэдээсэлнүүдэй Буряад Уласай гүрэнэй буряад хэлэндэ оршуулагдаһаниинь ехэ һайшаалтай. Саашадаа энэ шухала ажал үргэлжэлүүлэгдэхээр хараалагдана. Тэрэшэлэн «Бэлиг» түб 2021 онһоо хойшо Үбэр Байгалай арадуудай угсаата зүйн музейтэй хамта ажал ябуулжа, жэл бүхэндэ оршуулгын захил бэелүүлдэг гэжэ тэмдэглэлтэй.
Гүрэнэй оршуулгын албан Буряад Уласай Болбосоролой болон эрдэм ухаанай яаманай албан мэдэлэй «Үндэһэн хэлэнүүдые болон угсаата соёлой шэглэлтэй бусад зүйл шудалалгые дэмжэхэ талаар Улас түрын «Бэлиг» түб» гэһэн гүрэнэй бюджедэй эмхи зургаанай дэргэдэ байгуулагдаһаар, 2020 оной август һараһаа ажалаа ябуулжа эхилээ һэн гэжэ һануулая. Албан Буряад Уласай хуулинуудые, Буряад Уласай Толгойлогшын болон Засагай газарай гуримшуулгын хуули ёһоной шиидхэбэринүүдые ород хэлэнһээ буряадта оршуулхаһаа гадна болбосоролой һалбарида хабаатай уран зохёолнуудые ород хэлэнһээ буряадта, буряад хэлэнһээ ородто, мүн монгол хэлэнһээ ород ба буряад хэлэнүүдтэ оршуулдаг юм. Тиихэдэ үшөө нэгэ ажалай шэглэлынь хадаа уласай эмхи зургаануудай, эмхинүүдэй захилаар самбарнуудта, үүдэнэй хабтаһануудта бэшэгдэдэг гаршагуудые буряадшалга болоно.
Гэрэл зураг Буряад Уласай Соёлой яаманай сайтһаа абтаа
