Улас түрын «Бэлиг» түбэй долоон хоногой түсэблэлгын ээлжээтэ зүблөөн дээрэ захирал Баир Балданов Бүхэдэлхэйн ниигэмэй удха шанартай «Эрдэм» гэhэн бүгэдэ буряадай диктантда хабаадаhан мэргэжэлтэдтэ үнэмшэлгэнүүдые барюулба.
Дэлхэйн ямаршье нютагта ажаhуугша буряадууд түрэл хэлээрээ эрдэм мэдэсэеэ шалгахаяа «Эрдэм» диктантда хабаадаха аргатай байгаа.
«Бэлиг» түбэй ажалшад мүн лэ энэ удха ехэтэ хэрэгтэ оролсожо, тус диктант бэшэхэдээ, түбэй мэргэжэлтэд эрхим һайн үрэ дүн харуулаа гэжэ Баир Балданов бахархан тэмдэглээ. Бүхы хабаадагшад «эрхим» сэгнэлтэнүүдые абажа, тусхай үнэмшэлгэнүүдтэ хүртэбэ.
Һуралсалай номуудай, уран зохёол болон үндэhэн соёлой шэглэлтэй номуудай гар бэшэг хинан заһадаг мэргэжэлтэдhээ гадна үйлэдбэриин таһагай хүдэлмэрилэгшэд диктантда хабаадажа, мүн лэ «эрхим» сэгнэлтэдэ хүртэhэн байна.
Цырен Шагжинай «Верка» гэжэ хөөрөөнһөө хэһэг «Бэлиг» түбэй захиралай орлогшо, буряад хэлэ хүгжөөхэ талаар түбэй хүтэлбэрилэгшэ, хэлэ бэшэгэй эрдэмэй дид-доктор Оюна Забанова уншаа гэжэ тэмдэглэе.
Энэ хэмжээ ябуулга «Бэлиг» түбэй ажалшадай мэдэсэ шалгахаhаа гадуур, түрэл буряад хэлэеэ хүгжөөхэ, дэлгэрүүлхэ зорилготой түсэлнүүдые дэмжэхэ эрмэлзэл хүсэлыень дэмжэхэ арга болоо.
