Буряад хэлэнэй талаар бэелүүлжэ байгаа түсэлнүүдтэнь эдэбхитэйгээр хабаадалсажа, туһа хүргэһэнэйнь түлөө Улаан-Үдэ хотын Зүблэлтэ хороогой захиргаан Улас түрын «Бэлиг» түбэй захирал Баир Балдановта Баярай бэшэг барюулһан байна.
Түрэл хэлэнэймнай заншалта габшагай һарада согсологдодог дүнгүүдээр Буряад Уласай Толгойлогшын «Үндэһэн хэлэнэй үлзы хэшэг» гэһэн шанда Зүблэлтэ хороо мүнөө жэл хүртэжэ, 300 мянган түхэригөөр урмашуулагдаһан байха юм. Энэ хадаа һүүлэй үедэ хэгдэһэн ажалайнь, бэелүүлһэн түсэлнүүдэйнь үрэ дүн гэршэлһэнэй эли тодо тэмдэг болоно.
Баярай бэшэг барюулха ёһолол хороогой захиргаанай түсэблэлгын зүблөөндэ үсэгэлдэр эмхидхэгдээ. Хороогой хүтэлбэрилэгшэ Евгений Эрдынеев захиргаанда туһа хүргэһэн, хамтын ажалда хам оролсоһон хэдэн хүндэ талархалаа мэдүүлээ. Ниислэл хотын, илангаяа Зүблэлтэ хороогой түхэл шарайда буряад хэлэнэй шэнжэ бии нилээн ехэ болоо гэжэ тэрэ тэмдэглээ.
— Үнэхөөрөөшье, һүүлэй хэдэн жэлэй туршада түрэл хотымнай түбэй хороо горитой ажал ябуулаа. Түрэл хэлэнэймнай нюдэндэ харагдажа, шэхэндэ дуулдахань элбэг болонхой. Энэ ажалда уригдажа хабаадахадаа, гансаараа бэшэ, харин «Бэлиг» түбэйнгөө суг ажалтан нүхэдөөрөө оролсонобди. Тиимэһээ Баярай энэ бэшэг бултанай оролдолго урмашуулан тэмдэглэһэн ушартай, — гээд, харюу үгэ хэлэхэдээ, Баир Балданов онсолоо.
