Үндэһэн хэлэнүүдые болон угсаата соёлой шэглэлтэй бусад зүйл шудалалгые дэмжэхэ талаар Улас түрын «Бэлиг» түбэй Хинан заhалгын-хэблэлэй таhагай дарга, хэлэ бэшэгэй эрдэмэй дид-доктор Оюна Цыцыкова «БуряадФМ» радиосубагай «Үлзы утаһан. Болбосорол» гэһэн дамжуулгын шууд уулзалгада үнгэрэгшэ долоон хоногой эсэстэ хабаадаа.
Дамжуулгын хүтэлэгшэ Сэсэгма Ванжиловагай эмхидхэһэн хөөрэлдөөн Буряадай АССР-эй габьяата багша, РСФСР-эй арадай гэгээрэлэй эрхимлэгшэ, мэдээжэ багша Сэсэг Цыбановагай дүй дүршэлтэй, уг гарбалтай танилсуулһан «Бэлигэй арюун юртэмсэ» гэhэн номдо зорюулагдаһан байгаа. Тус согсолбори «Бэлиг» түбтэ хэблэгдээ hэн гээд hануулая.
Шэнэ номой согсологшо, Оросой Холбоото Уласай габьяата, Буряад Уласай арадай зүжэгшэн, Орос Уласай Уран зохёолшодой ба Сэдхүүлшэдэй холбоонуудай гэшүүн Чингис Гуруев, ажалай ветеран, ниитын ажал ябуулагша Нина Дашиева, багшын ажалай ветеран Светлана Шойнжонова гэгшэд дамжуулгын айлшад боложо уригдаа.
«Бэлигэй арюун юртэмсэ» (https://belig.ru/%d0%b1%d1%8d%d0%bb%d0%b8%d0%b3-%d1%82%d2%af%d0%b1%d1%82%d1%8d-%d0%bc%d2%af%d0%bd%d0%b4%d1%8d%d0%bbh%d1%8d%d0%bd-%d0%b1%d1%8d%d0%bb%d0%b8%d0%b3%d1%8d%d0%b9-%d0%b0%d1%80%d1%8e%d1%83/) ном тухай дэлгэрэнгыгээр Улас түрын «Бэлиг» түбэй сайт дээрэ уншахада болоно.
