Улас түрын «Бэлиг» түб Захааминай аймагай һургуулинуудай буряад хэлэнэй болон уран зохёолой багшанартай онлайн-уулзалга эмхидхэбэ.
Энэ долооной эхиндэ «Бэлигэй» захирал Баир Балданов албанай хэрэгээр Захааминай аймагай Алдар солын орденоор түгэс шагнагдагша Б.М. Дамчеевай нэрэмжэтэ Санагын юрэнхы болбосоролой дунда һургуули зорижо ошоһон байгаа. Тэндэ түрэл хэлэнэй ба уран зохёолой хэшээлнүүд урда жэлнүүдтэ үсөөрүүлэгдэжэ, байдал доройтон алдаһан юм.
Һуралсалай энэ жэлдэ «Бэлиг» түбэй дурадхалаар һургуулиин түсэбтэ буряад хэлэнэй ба уран зохёолой хасагдаһан хэшээлнүүд бусаагдаһан юм. Тиихэдээ һургуули зургаан үдэрэй туршада ажалладаг болоо.
Санагаһаа эмхидхэгдэһэн онлайн-суглаанда Оросой Холбоото Уласай соёлой габьяата хүдэлмэрилэгшэ, мэдээжэ ирагуу найрагша, сэдхүүлшэн, Захааминай аймагай хүндэтэ эрхэтэн Николай Шабаев хабаадалсажа, оролто үгэ хэлэхэдээ, түрэлхи хэлэнэй ба уран зохёолой үүргэ үндэр юм, ерээдүйн үенүүдтэ тэдэнээ дамжуулха гээшэ айхабтар харюусалгатай, хүндэтэйшье һаа, хүшэрхэн зорилго болоод байнагэжэ тэмдэглээ.
Захааминай багшанартай эмхидхэгдэһэн суглаанда Улас түрын «Бэлиг» түбэй захирал Баир Балданов Санагаһаа, захиралай орлогшо, Буряад хэлэ хүгжөөхэ талаар Улас түрын түбэй хүтэлбэрилэгшэ Оюна Забанова, Д.Банзаровай нэрэмжэтэ Буряадай гүрэнэй ехэ һургуулиин Буряад хэлэнэй ба уран зохёолой дээдын һургуулиин захирал Гарма-Ханда Гунжитова гэгшэд онлайн-аргаар Улаан-Үдэһөө элидхэлнүүдые хэһэн байна.
Захааминай аймагай Болбосоролой хүтэлбэриин дарга Беликто Будаев, мэргэжэлтэн Жаргалма Тубанова, буряад хэлэнэй багшанарай аймагай нэгэдэлэй хүтэлбэрилэгшэ Таисия Мархаева гэгшэд аймаг дотор ябуулжа байһан ажал тухайгаа хөөрөө.
Аймагай һургуулинуудай дүршэл ехэтэй багшанар зүбшэн хэлсэлгэдэ хабаадажа, үгэ хэлэхэдээ, түрэл хэлэн ба уран зохёолдо үхибүүдые мүнөө сагта һургахада, долоон хоногой табан хэшээлшье үсөөн гэжэ тэмдэглээ. Мүн тиихэдэ һуралсалай номдо оруулагдадаг даабаринууд, зохёолнууд сагтаа тааруу, һонирхолтой байха ёһотой, ном зохёогшодто тиигэжэ дамжуулхыень эмхидхэгшэдые гуйгаа.
Ерэхэ намар, һуралсалай жэлэй эхиндэ, Захааминай аймагта буряад хэлэ заалгаар үшөө нэгэ бүхы багшанар болон хүмүүжүүлэгшэдэй хабаадалгатай уулзалга-суглаа үнгэргэхэ гэжэ хэлсэгдээ.
