Улас түрын «Бэлиг» түбэй захиралай орлогшо — Буряад хэлэ хүгжөөхэ талаар Улас түрын түбэй хүтэлбэрилэгшэ, хэлэ бэшэгэй эрдэмэй дид-доктор Оюна Забанова болон ахамад мэргэжэлтэн, һурган хүмүүжүүлгын эрдэмэй дид-доктор Бадмажап Будаин хоёр Буряад Уласай дээдэ hургуулинуудай оюутадай дунда буряад хэлээр үнгэргэгдэhэн олимпиадада шүүгшэд боложо хабаадаа.
Заншалта энэ мүрысөөн үсэгэлдэр, мартын 11-дэ, Зүүн-Сибириин гүрэнэй арга зүйн болон хүтэлбэриин ехэ hургуулида улас түрын хэмжээндэ үнгэргэгдэхэдөө, Эсэгэ ороноо хамгаалагшын жэлдэ зорюулагдаһан байна.
Тус мүрысөөндэ Улаан-Үдэ хотодо ажалаа эрхилдэг дүрбэн дээдэ hургуулиин буряадаараа харилсадаг оюутад эрдэм мэдэсэеэ, шадабарияа харуулба. Тус олимпиадын Дүримдэ энэ хэмжээ ябуулгада буряад хэлээр мэргэжэлтэ бэшэ шэглэлээр hургуули шудалжа байhан оюутад хабаадаха гэhэн эрилтэ табигданхай юм.
Оюутадай энэ мүрысөөн хэдэн бүлэгhөө бүридэhэн байгаа. Үгэ хэлэгшын эрхим шадабаряар мүрысөөн, диктант бэшэлгэ, шүлэг зохёол уран гоёор уншалга, ирагуу дуунай шата.
Диктант бэшэхэ шата «Буурашагүй алдарыетнай манай арад мартахагүй…» гэhэн сэдэбтэй байба. Оюутадай hонирхол татаhан «Мэдэнэбди, hананабди, омогорхонобди» гэhэн квиз үнгэрөө. Ухаа гүйлгэхэ зорилготой энэ шатада «Буряад орон агуу дайнай гал дүлэнэй соробхилооной үедэ» гэhэн сэдэбээр таба-табан асуудалда харюу үгэхэ, тиихэдэ үгтэhэн 10 гаран үзэгһөө үгэ зохеохо; дайнда хабаадагшада бэшэг бэшэхэ гэhэн даабаринуудhаа бүридэhэн байгаа.
Бүхы шатануудые дабаhанай удаа иимэ дүнгүүд элирүүлэгдэбэ:
I hуури – Доржо Банзаровай нэрэмжэтэ Буряадай гүрэнэй ехэ hургуулиин бүлгэм;
II hуури – Зүүн-Сибириин гүрэнэй арга зүйн болон хүтэлбэриин ехэ hургуулиин оюутад;
III hуури – Зүүн-Сибириин гүрэнэй соёлой дээдэ hургуулиин бүлгэм;
IV hуури – В.Р. Филипповэй нэрэмжэтэ Буряадай гүрэнэй хүдөө ажахын академиин оюутад.
