Захааминай аймагай Уран hайханай шэглэлэй Сахирай юрэнхы болбосоролой интернат-дунда hургуулида нютаг можонууд хоорондын буряад хэлэнэй шэглэлтэй һурагшадай зуһалан долоон хоногой туршада үнгэргэгдэбэ.
Буряад Уласай Захааминай, Зэдын, Сэлэнгын, Ивалгын, Хэжэнгын, Кабанскын, Хориин, Яруунын, Мухаршэбэрэй, Баргажанай, Хурамхаанай, Түнхэнэй, Ахын аймагуудhаа, Улаан-Үдэ хотоhоо, Эрхүү можын Усть-Ордагай ба Үбэр Байгалай хизаарай Агын буряад тойрогуудай 7-8 ангиин 60 hурагшадые Сахирай һургуули угтан абаа.
Энэ халаанда буряад хэлэ ба уран зохёолоор онсо илгарhан үхибүүд хабаадана гээд hануулая. Долоон хоногой туршада үхибүүд буряад хэлэеэ улам хүгжөөбэ, ёhо заншалтай, соёл болбосоролтой, аймагай нютаг нугын түүхэтэй танилсаа. Үдэр бүри hонин уулзалганууд үнгэрөө, Захааминай гайхамшагта газарнуудые хараха, үзэхэ арга олгогдоо. Тиихэдэ гансашье эдэ хэмжээ ябуулгануудаар халаан дүүрээ бэшэ, мүн тиихэдэ элдэб олон мастер-классууд, буряад арадай нааданууд, бэеэ hорилгын элдэб мүрысөөнүүд үхибүүдэй hонирхол татаа.
Энэ халаанда Усть-Ордагай ба Агын буряад тойрогуудһаа, Буряад Уласай угсаата соёлой шэглэлтэй hуралсалай эмхинүүдэй эблэлдэ ородог hургуулинуудhаа ерэhэн хүтэлбэрилэгшэ багшанартай дүхэриг шэрээ эмхидхэгдэжэ, тэдэнэр дүй дүршэлөөрөө хубаалдаа, мастер-классуудые харуулаа.
Болбосоролой болон эрдэм ухаанай яаман тус хэмжээ ябуулгада «Буряад Уласта буряад хэлэ сахин хүгжөөлгэ» гэһэн Гүрэнэй программаар мүнгэ һомолоо. Улас түрын «Бэлиг» түб угсаата соёлой шэглэлтэй hуралсалай эмхинүүдэй эблэлтэй хамта эмхидхэлэй ажал ябуулһан байха юм.
