Болбосоролой болон эрдэм ухаанай сайд Валерий Поздняковой уласай һургуулинуудай захиралнуудтай мүнөөдэр үнгэргэһэн зүблөөндэ Улас түрын «Бэлиг» түбэй захирал Баир Балданов хабаадаа.
— Зүбшэн хэлсэгдэһэн асуудалнуудай тоодо эхилхэеэ байһан һуралсалай шэнэ жэлдэ буряад хэлэ һургуулинуудта заалга тухай дахин хэлэгдэжэ, Болбосоролой болон эрдэм ухаанай сайд энэ асуудалда захиралнуудай онсо анхарал хандуулба, — гэжэ Баир Балданов мэдээсээ.
«Һуралсалай шэнэ жэлэй эхилхын урда тээ буряад хэлэнэй хэшээлнүүдые үсөөрүүлхэ һэдэлгэнүүд тухай һанаа зобомо мэдээсэл эндэ-тэндэһээ ерэнэ. Уласаймнай 105 һургуулида түрэл буряад хэлэн заагдана, 232 һургуулида – буряад хэлэн гүрэнэй хэлэн гэһэн программаар заагдана.
Тиихэдээ түрэл буряад хэлэнэй программаар долоон хоногой туршада 5-һаа үсөөн бэшэ (хэлээрнь – 3, уран зохёолоор – 2) хэшээл үнгэргэгдэхэ ёһотой. Харин гүрэнэй буряад хэлэн долоон хоногой туршада хоёр хэшээлһээ үсөөн бэшээр заагдаха зэргэтэй. Һургуулиингаа түсэбүүдые һайнаар хаража, иимэл хубаари баталагты», — гээд, сайд Валерий Поздняковой захиралнуудта хандаһан тухай «Бэлиг» түбэй хүтэлбэрилэгшэ хөөрэбэ.
Аймаг нютагуудай, хото, хүдөөгэй һургуулинуудта буряад хэлэнэй хэшээлнүүдэй үсөөрүүлэгдэжэ байһые гэнтэ мэдэжэрхёо һаа, «Бэлиг» руу +7(301-2) 33-52-70 утаһаар, буряад хэлэ хүгжөөхэ талаар Улас түрын түб руу +7(301-2) 44-26-44 утаһаар хонходожо, belig@mail.ru , burtub@yandex.ru сахим хаягуудаар бэшэжэ, шууд дохёо үгэхэдэ болоно.
