Улас түрын «Бэлиг» түбэй захирал Баир Балданов «Буряад ТВ» телесубагай анхан байгуулагдаһаар 5 жэлэй баярта хабаадаба. Зохёохы хүдэлмэрилэгшэдые ба бусад ажалтан олониие амаршалхадаа, толгойлжо байһан түбэйнгөө үмэнэһөө сурбалжалагшадта болон эрхилэгшэдтэ хэрэгтэй буряад хэлэнэй элдэб янзын толинуудые бэлэг болгон дамжуулһан байха юм.
Эгсэ табан жэлэй урда тээ олониитын уласай толгойлогшо Алексей Цыденовэй шиидхэбэреэр үдэр һүнигүй үргэлжэ буряадаар хэлэн харууулдаг түүхэдэ түрүүшын телесубаг байгуулагдаа һэн гээд һанууулая.
Нилээн удаан сагай туршада олониитын түлөөлэгшэдэй олон тоото хандалгануууд дотор түрэл хэлэнэймнай түгшүүритэйхэн байдалда ороһон тухай хэлэгдэдэг, бэшэгдэдэг бэлэй. Засаг барижа байһан үндэр тушаалта ноёд дарганарташье, арадай һунгамалнуудташье иимэ мэдүүлгэнүүд эльгээгдэдэг һэн.
Эдэ бүгэдые хараадаа абажа, буряад хэлэнэй саашанхи хуби заяанда нүлөөлхэ аргатай зэбсэг болгон, энэ телесубагые уласай дарга байгуулаа бшуу. Табан жэлэй туршада «Буряад ТВ» һайн тэнжэжэ, хүл дээрээ гаранхай. Анхандаа үзэгдөөгүй ажал бүтэжэ, шанар һайтай шэб шэнэ дамжууулганууд зохёогдоо. Залуушуулдашье, наһатайшуулдашье зорюулагдаһан һонирхолтой сахим ниитэлэлгэнүүд энэ субагаар дамжуулагдадаг.
- Үндэһэн хэлэнэймнай түлөө хамсыгаа шамаад шармайжа ябаһан «Буряад ТВ» субагайхидай хэһэн хэрэг урагшатай, хэлэһэн үгэнь удха ехэтэй байг лэ, — гэжэ Баир Балданов үреэлээ.
