Багшын ажалай ветеран Светлана Батуева-Урбанеевагай «Нүхэрэй бэлэг» гэһэн ном 2025 оной хуушаар Улас түрын «Бэлиг» түбтэ нара хараба.
Светлана Батуева-Урбанеева түрэл буряад хэлэнэйнгээ хүгжэлтэдэ хубитаяа оруулалсажа, үхибүүдтэ зорюулһан шүлэгүүдые, уран һайхан найруулгануудые бэшэдэг юм.
Тоонто нютаг, Эхэ орон, түрэлхи хэлэн, шэдитэ байгаали, дүрбэн хүлтэ амитад, хүүгэдэй абари зан тухай, мүнөө үеын багашуулай һонирхол удхалан харуулһан шүлэгүүдээ зохёоходоо, үхибүүдэй абари зан, наһанайнь хаһа, ухаан бодолойнь хүгжэлтые хараадаа абаһан байна.
Гадна хүмүүжүүлгын удхатай шүлэгүүд номдо оруулагданхай. Аба эжынгээ нангин һургаал дагажа, үнэн сэхэ, арюун сэбэр сэдьхэлтэй ябагты гэжэ уряалһан олон шүлэг эндэ үгтэбэ.
Оршон тойронхи байгаалияа хамгаалха, анхаралтайгаар хандаха, ан амитадые хайрлаха хэрэгтэй гэһэн бодол дамжуулһан шүлэгүүд уншагшадай анхарал заатагүй татаха байха.
Энээхэн ном бэлигтэй залуу уран зурааша Соёлма Гармаевагай үнгэтэ зурагуудаар шэмэглэгдэнхэй хадаа багашуулда, хүмүүжүүлэгшэдтэ, багшанарта, гэртэхиндэ һонирхолтой байха гэжэ найдагдана.
Тус номой сахим хэбынь Буряад Уласай Болбосоролой болон эрдэм ухаанай яаманай баталһан түсэбөөр Улас түрын «Бэлиг» түбтэ бэлдэгдэжэ, «Буряад Уласта буряад хэлэ сахин хүгжөөлгэ» гэһэн Гүрэнэй программада һомологдоһон мүнгөөр барлагдаһан байха юм. Уласай болбосоролой эмхи зургаануудаар тараагдаха.
