Буряад ФМ радиосубагай шэнэ байрын баярта Улас түрын «Бэлиг» түбэй захирал Баир Балданов хабаадаба.
Буряад Уласай Болбосоролой болон эрдэм ухаанай сайд Валерий Поздняковой үмэнэһөө, «Бэлиг» түбэй зүгһөө «Буряад ФМ» радиосубагай зохёохы ажалтан олониие шэнэ, һаруул байрада нүүжэ ороһон ушараарнь Баир Балданов амаршалаад, 2024 ондо хэблэгдэһэн номуудай нэгэ-нэгэ шэрхэг яаманай шиидхэбэреэр
бэлэг болгон дамжуулаа.
— Түрэл хэлэнэйнгээ хүгжэлтэдэ горитой хубитаяа оруулжа байһан танай, үндэһэн буряад радиосубагай, үүргэ ехэ, — гээд «Бэлиг» түбэй захирал тэмдэглээ.
Болбосоролой болон эрдэм ухаанай яаманай захилаар «Буряад ФМ» радиосубаг үхибүүдэй «Эдир репортёр» дамжуулга бэлдэжэ, агаарай долгиндо гаргадаг юм. Хүүгэдэй хэлэлгэ хүгжөөлгэдэ тус дамжуулга ехэ туһатай гээд мэргэжэлтэд тоолоно.
Баяр ёһололой үедэ «Буряад ФМ» радиосубагай захирал Жанна Дымчикова хамтын түсэлнүүдые урагшатайгаар бэелүүлжэ байһанай түлөө Баир Балдановта баярай бэшэг барюулаа.
