Буряадай мэдээжэ ирагуу найрагша, уран зохёолшо Галина Базаржаповагай «Хүхы тухай домоглол» гэhэн ном Улас түрын «Бэлиг» түбтэ хэблэгдэбэ.
Энэ ном дотор хүхы шубуун тухай хоморой хөөрөөн буряадаар ба ородоор найруулагдаhан байна.
Урдын урда сагта Шубуудай хаанай дали жэгүүртэниие суглуулаад, алиндань дууша бэлиг бэлэглэхэб гэһэн шиидхэбэри тухай домоглол-хөөрөөн номой эгээл эхиндэ үгтэнхэй. Энэ суглаанда хожомдоод, һахы һалаг болоһон хүхы шубуунай ниидэн ерээд, дууша хоолой айладхахые гуйһан ушар таатай зохидоор дамжуулагдана.
Донгодохо һайхан хоолой бэлэглэхэдээ, Шубуудай хаан хүхыдэ «дуулаханьшье дуулахаш, харин дальбараагаа тэжээхэ сүлөөгүй болохош» гэхэдэнь, тэрэ уйдан татабашье, донгодохо хүсэлдөө абтан, зүбшөөһэн юм ха. Тиигэжэ хүхы шубуун үндэгэеэ ондоо шубуудай уурхай руу хэжэрхидэг болоһон.
Энээнһээ гадна хүхын дабтагдашагүй дуугаараа ан амитадта, хүн зондо үзүүлдэг нүлөө тухай хүдөөгэй хүнэй-адаглагшын нюдөөр тон hонирхолтойгоор бэшээтэй.
Галина Базаржапова – уран шүлэг болон найруулгада тэгшэ бэлигтэн һэн хадаа, хөөрөөн бүхэн соогоо ажамидаралай сохисо эли тодоор тобойлгон харуулдаг юм.
Эндэшье hургаал боломоор домоглол дамжуулжа, хөөхэй хүхы шубуун тухай һонин хөөрөө, шүлэг зохёогоо. Энэ бүтээлынь эдир үхибүүдэйшье, үргэн уншагшадайшье анхарал заатагүй татаха байха.
Номой хуудаһанууд бэлигтэй уран зурааша Семён Суворовой зурагуудаар шэмэглэгдэнхэй, гадарынь ургажа ябаа уран гартай Ринчин Туртуевай зурагаар гоёогдонхой.
Тус номой сахим хэбынь Буряад Уласай Болбосоролой болон эрдэм ухаанай яаманай баталһан түсэбөөр Улас түрын «Бэлиг» түбтэ бэлдэгдэжэ, «Буряад Уласта буряад хэлэ сахин хүгжөөлгэ» гэһэн Гүрэнэй программада һомологдоһон мүнгөөр барлагдаа. Болбосоролой эмхи зургаануудаар hаяын сагта тараагдаха юм.
