Зэдын аймагай Н.С Сосоровой нэрэмжэтэ Цагаатайн юрэнхы болбосоролой дунда һургуулида «Абын табан эрдэм – 2024» гэһэн Улас түрын мүрысөөн үнгэргэгдэбэ.
Тус хэмжээ ябуулга анха түрүүшынхиеэ 2020 ондо Цагаатайн һургуулиин буряад хэлэнэй багша Баярма Балдановагай болон һургуулиин суг ажалтанай бүлэгэй эдэбхи үүсхэлээр эмхидхэгдэһэн юм.
Тэрэнииень Болбосоролой болон эрдэм ухаанай яаман, «Бэлиг» түбэй буряад хэлэ хүгжөөлгын Улас түрын түб, бүридэлдэнь Цагаатайн һургуулиин ородог Үндэһэн һургуулинуудай эблэл дэмжэһэн юм.
Эмхидхэгшэдэй һаналаар, тус мүрысөөн эсэгын болон эрэ хүнэй үүргэ олониитын хэмжээндэ дээшэлүүлхэ хэрэгтэ шэглүүлэгдэжэ, хүбүүдые эрэ хүн шэнгеэр хүмүүжүүлгэдэ туһатай байха. Гэр бүлэеэ, Эхэ ороноо хамгаалжа шадаха, дүтынгөө зондо тулга болохо, мүн буряад арадай бүһэтэйшүүлэй заншалта дадал ба шадабаринуудые мэдэхэ болон ажабайдалдаа хэрэглэхэ – эдэ бүгэдэндэ хүбүүд хара багаһаа һураха ёһотой бшуу.
Мүрысөөн мүнөө табадахияа эмхидхэгдэбэ. Заншалта ёһоороо тэрэ Орос гүрэндэ тэмдэглэгдэдэг Эсэгын үдэртэ зорюулагдажа, Буряад хэлэнэй габшагай һарын хэмжээндэ үнгэргэгдэдэг. Энэ айхабтар хэрэгтэй, тон ехэ удха шанартай мүрысөө «Буряад Уласта буряад хэлэ сахин хүгжөөлгэ» гэһэн Гүрэнэй программын мүнгөөр Болбосоролой болон эрдэм ухаанай яаман хангадаг юм.
