Ерэхэ гарагай гурбанда, сентябриин 8-да, хизааргүй ехэ гүрэнэймнай булан тохой бүхэндэ Бүгэдэ Оросой «Орос Улас – Арадуудай үлгы» гэhэн диктант бэшэгдэхэнь.
Энэ хэмжээ ябуулга Оросой Холбоото Уласай арадуудай хэлэнүүдэй үдэртэ дашарамдуулагдахаһаа гадна Оросой арадуудай эб нэгэдэлэй жэлдэ зорюулагдана.
Диктантын текст зохёогшо — элитэ авар уран шүлэгшэ Расул Гамзатов. Зохёолынь авар хэлэнһээ ород хэлэндэ оршуулагдажа, Калининградһаа Владивосток хүрэтэр нэмжыһэн энэ һайхан газар дайдада эбтэй эетэй ажаһуудаг олон тоото үндэһэ яһатанай хэлэнүүдтэ, тэрэ тоодо буряад хэлэндэ оршуулагдаа.
Буряад хэлэн дээрэ диктант бэшэхэ зондо тусхай талмайнууд хараалагдахаһаа гадна https://dictant.ruwiki.ru/ гэжэ сайт дээрэ онлайн аргаар бэшэхэ боломжо үгтэнэ. Текстыень Улас түрын «Бэлиг» түбэй Гүрэнэй оршуулгын албанай хүтэлбэрилэгшэ, Оросой Холбоото Уласай Оршуулагшадай холбооной гэшүүн Дыжид Мархадаева буряадшалаа.
«Бэлиг» түбэй захиралай орлогшо, хэлэ бэшэгэй эрдэмэй дид-доктор Оюна Забанова сахим миндаhанда уншажа, шагнаха түхэлыень бэлдээ юм.
Тус хэмжээ ябуулгын гол зорилго хадаа гүрэнэймнай бүгэдэ арадуудай түрэл хэлэнүүдые дэмжэлгэ болоно.
«Орос Улас – Арадуудай үлгы» гэhэн Бүгэдэ Оросой диктантда хэншье хабаадаха эрхэтэй, аргатай. Мүнөө жэл Буряад ороной аймагуудташье, ниислэлдэшье талмайнууд эмхидхэгдэхэ.
Диктантын дүнгүүд 2026 оной сентябриин 30 болотор согсологдохоор түсэблэгдэнхэй. Эмхидхэлэй гү, али диктант бэшэхэ асуудалнуудаар 8 (3012) 44-26-44 утаһаар хонходожо лаблахада болоно.
