Байгалай болбосоролой хуралдаанда хабаадахаяа Буряад Уласай ниислэл ерэһэн Үбэр-Байгалай хизаарай Агын Буряадай болон Эрхүү можын Усть-Ордагай Буряадай тойрогуудай түлөөлэгшэд Улас түрын «Бэлиг» түб руу айлшаар буугаа.
Усть-Ордагай тойрогой захиргаанай үндэһэн хэлэнүүдэй талаар таһагай дарга Вероника Харбанова, Агын тойрогой захиргаанай Ниигэмэй һалбариин хүтэлбэриин даргын орлогшо – ниигэмэй хүгжэлтын таһагай дарга Розалия Балдоржиева, тэрэнэй орлогшо Алла Цыренжабэ, Үбэр-Байгалай хизаарай ниигэмэй һалбариин хүдэлмэрилэгшэдэй мэргэжэл дээшэлүүлгын Агын дээдэ һургуулиин захирал Һама Рабданова «Бэлиг» түбэй мүнөөдэрэй ажалтай танилсабад. Түбэй таһагуудай хүдэлмэрилэгшэд болон дарганартай уулзажа, хамтын ажалай саашанхи хараа шэглэлнүүдые зүбшэн хэлсэһэн байха юм.
Буряад хэлэнэй, тэрэниие шудалалгын ба сахин хүгжөөлгын ниитэ нэгэн оршон байгуулха тухай хэлсээн 2018 оной эхиндэ Буряад Уласай, Эрхүү можын болон Үбэр-Байгалай хизаарай Болбосоролой болон эрдэм ухаанай яамануудай хоорондо баталагдаһан гээд һануулая. Тэрэниие бэелүүлхэ талаар нютаг можонууд хоорондын хамтын хэмжээ ябуулганууд эмхидхэгдэнэ. Һургуулинуудые буряад хэлэнэй ба уран зохёолой һуралсалай номуудаар хангаха ажалай гуша гаран жэлэй туршада гол зорилго байхаһаа гадуур, «Бэлиг» хэблэл һүүлэй үедэ олон шэглэлтэй түб болонхой. Буряад хэлэ хүгжөөлгын талаар, мүн тиихэдэ гүрэнэй хэлэнүүдтэ албан ёһонойхёор оршуулгын ажал түбэй мэдэлдэ ороно. Эдэ бүгэдэ шэглэлнүүдээр хоёр тойрогойхидтой хамтын амжалтатай ажал ябуулагдана гээшэ.
Мүнөө жэлэйнгээ ажал тухай айлшад хөөрөө, ерэхэ жэлдэ хамта бэелүүлхээр түсэлнүүд тухай дурадхалнуудые оруулаа.
- Хамтын ажалнай аргагүй ехэ. Хэр зэргэ амжалтатайгаар тэрэнээ бүтээнэбибди, тэрээнһээмнай түрэл хэлэнэймнай ерээдүй мүн лэ бага бэшээр дулдыдаха. Тиимэһээ саашадаашье урагшатай ажаллахаар бэлэмди, — гээд «Бэлиг» түбэй захирал Баир Балданов уулзалга дээрэ тэмдэглэһэн байна.
