Үндэһэн хэлэнүүдые болон угсаата соёлой бусад зүйл шудалалгые дэмжэхэ талаар Улас түрын «Бэлиг» түбэй хинан заhалгын-хэблэлэй таhагай дарга Оюна Цыцыкова Буряадай түрүүшын үндэһэн телесубагай «Жэгүүртэ хүлэг» дамжуулгада хабаадаба.
«Жэгүүртэ хүлэг» дамжуулгын хүтэлэгшэ Лариса Халхаровагай эмхидхэһэн хөөрэлдөөн нэн түрүүн «Бэлиг» түбэй XXIX Номой дугыланда хабаадаһан, ямар амжалта туйлаһан тухай асуудалнуудта зорюулагдаа.
— Улас түрын «Бэлиг» түб Буряад Уласай Үндэһэтэнэй номой сангай эмхидхэдэг Номой мүрысөөндэ заншалта ёһоор, жэлһээ жэлдэ эдэбхитэйгээр хабаададаг юм. Мүнөө жэлэй мүрысөөндэ хоёр номнай үндэр шанда хүртөө. «Һуралсалай-онол аргын эрхим ном» гэһэн номинацида Лариса Батомункуевагай «Словарна үгэнүүд. Ажалай дэбтэр. 2 класс» гэһэн ном илан гараа. «Буряад хэлэн дээрэ хэблэгдэһэн жэлэй эрхим ном» гэһэн номинацида Цыдып Цырендоржиевай «Үлзы һайхан Үлзытэмнай. Туужа ба үгүүлэлнүүд» гэһэн ном шалгараа. Энэ үндэр туйлалтанууднай суг ажалтанай ашаг үрэтэйгөөр ажаллаһанай үрэ дүн болоно, — гээд Оюна Цыцыкова тэмдэглээ.
Тэрээнһээ гадна «Бэлиг» түбэй жэл бүриин түсэб яажа табигдадаг бэ, ямар номууд тэрэ түсэбтэ ородог бэ, ямарнуудынь хэблэгдэн гарааб, 2025 ондо ямар түсэбүүд табигданхайб гэжэ Оюна Цыцыкова хөөрэжэ үгэһэн байна.
— Түбтэ hүүлэй жэлнүүдтэ жэл бүри 30 гаран ном hудар барлагдан гарана. Һургуулиин урдахи болбосоролой, эхин, дунда ба дээдэ hургуулинуудта хүүгэдэй үзэхэ, уншаха номууд, hуралсалай программанууд, багшанарай хэрэглэхэ онол аргын заабаринууд, хүүгэдтэ зорюулагдаhан уран зохёолой согсолборинууд, угсаатанай заншалта һурган хүмүүжүүлгэ болон багшын эрдэмээр, хүүгэдтэ зорюулагдаhан уран зохёолой, эвенк, hоёд хэлэнүүд дээрэ барлагдаhан номууд болоно. Эдэ бүгэдые Гүрэнэй hуралсалай шэнэ заршамай эрилтээр hуралсалай шэнэ методическа хүсэд суглуулбаринуудые болон багшанарта туhаламжа болохо элдэб хэрэгсэлнүүдые, заабариин материалнуудые хэблэн гаргаха, хүршэ Үбэр Байгалай хизаарай Агын болон Эрхүү можын Усть-Ордагай Буряадай тойрогуудай захиргаануудтай холбоо харилсаа улам үргэдхэхын тула горитой ажал ябуулагдажа байна, — гэжэ «Бэлиг» түбэй хинан заhалгын-хэблэлэй таhагай дарга харагшадта онсолон хөөрөө.
Оюна Цыцыковагай хабаадалгатай «Жэгүүртэ хүлэг» дамжуулга харахыетнай дурадханабди.
https://vk.com/video-211498616_456244152?list=f696ecf3ef1318613f
