Буряад Уласай Толгойлогшо Алексей Цыденовэй үнгэргэһэн Үндэһэ яһатанай зүблэлэй ээлжээтэ зүблөөндэ Улас түрын «Бэлиг» түбэй захирал Баир Балданов хабаадаба.
Буряад Уласай Хойто зүгэй үсөөн тоото үндэһэн арадуудай ниитын эблэлэй хүтэлбэрилэгшөөр һаяхан һунгагдаһан тэрэ ниитын тушаалаараа уласай Толгойлогшын дэргэдэ ажалладаг тус зүблэлэй гэшүүн болонхой.
Хани барисаанай Байшанда эмхидхэгдэһэн энэ зүблөөндэ гурбан асуудал зүбшэн хэлсэгдэһэн байха юм.
Хани барисаанай Байшанай ажаябуулга һайжаруулха тухай асуудал Толгойлогшын ба Засагай газарай Захиргаанай Үндэһэ яһатан хоорондын харилсаанай болон эрхэтэнэй үүсхэл хүгжөөлгын хороон бэлдээ. Байшан дотор байгуулагдаһан үндэһэн соёлой шэнэ оршон зайн талмайтай танилсалга эмхидхэгдэһэн байна.
Буряад Уласай юрэнхы болбосоролой эмхи зургаануудта хари гүрэнүүдэй эрхэтэдэй үхибүүдые һурган хүмүүжүүлгын асуудалаар Болбосоролой болон эрдэм ухаанай сайдай нэгэдэхи орлогшо Наталья Сандакова элидхээ.
Хариһаа ерэһэн хүүгэд манай эндэхи һургуулинуудта ороходоо, ород хэлэ ба Орос гүрэнэй түүхээр тусхай шалгалта бариха ёһотой. Хууляар тогтоогдоһон энэ эрилтын хэр зэргэ дүүргэгдэдэг тухай, шэнэ оршондо үхибүүдые зүбөөр, зөөлэнөөр дадхааха ажал тухай элидхэл дотор хэлэгдээ.
Залуушуулай дунда алуур дээрмын ябадал һэргылхэ ажал тухай Залуушуулай хэрэгүүдэй талаар Улас түрын агентствын хүтэлбэрилэгшэ Татьяна Парпаева зүблөөндэ хабаадагшадта хөөрөө. Энэ асуудалаар зүбшэн хэлсэлгэдэ хабаадагшад мүнөө үеын залуу зониие зүбөөр хүмүүжүүлхэ, тэдэнтэй өөһэдынь хэлэн дээрэ харилсаха шухала гэжэ тэмдэглээ.
Манай уласай олон үндэһэтэ арад зон хэр угһаа хойшо эбтэй эетэй ажаһуудаг, энэ һайхан заншалнай заатагүй сахигдаха ёһотой гэжэ уласай дарга Алексей Цыденов зүблөөн дээрэ онсолһон байха юм.
