Буряад Уласай Болбосоролой болон эрдэм ухаанай сайд Валерий Поздняковтой хамта Улас түрын «Бэлиг» түбэй захирал Баир Балданов үсэгэлдэр Хяагтын аймаг ошожо, хоёр гүрэнэй хилэ дээрэ Оросой болон Монголой дээдэ һургуулинуудай захиралнуудай Нэгэдэхи хуралдаанда хабаадагшадые угталсаба.
Буряад орон руу айлшалан ерэгшэдэй тоодо – Монголой түрүүшын космонавт, Зүблэлтэ Холбооной Баатар, Бүгэдэ Найрамдаха Монгол Уласай Баатар Жүгдэрдэмидийн Гуррагчаа, Монгол Уласай Эрдэмэй академиин юрэнхылэгшэ Дэмбэрэл Содномсамбуу. Орос болон Монгол оронуудай хоорондохи харилсаа холбоо бэхижүүлгэдэ энэ хоёр томо айлшадай оруулһан хубитань айхабтар ехэ юм.
Мүн тиихэдэ Монгол Уласай Болбосоролой болон эрдэм ухаанай сайд Пүрэвсүрэнгийн Наранбаяр хилэ гаталан, Буряад Уласай хүндэтэ айлшан болоо. Оросой болон Монголой дээдэ һургуулинуудай захиралнуудай Нэгэдэхи хуралдаанай хүндэтэ хабаадагшын Буряад орон руумнай морилон ерэһэниинь аргагүй үндэр удха шанартай.
Болбосоролой болон эрдэм ухаанай һалбарида хоёр гүрэнэй хоорондохи харилсаа хүгжөөхэ, бэхижүүлхэ, мүн тиихэдэ залуу үетэндэ дээдэ эрдэм олгохо талаар хамтын ажалда айхабтар ехэ түлхисэ болохо энэ хуралдаанай удха шанар гэршэлэгдэбэ бшуу. Оросой Холбоото Уласай Эрдэм ухаанай болон дээдэ болбосоролой яаман ба Монгол Уласай Болбосоролой болон эрдэм ухаанай яаман хоёрой хоорондо баталагдахаар түсэблэгдэһэн хэлсээндэ гар табигдажа, тус ехэ ажал улам эршэдэхэ. Мүн тиихэдэ Улаан-Үдэдэ Монгол хэлэнэй ба соёлой түб нээгдэхээр хараалагданхай.
