Улас түрын «Бэлиг» түбэй захиралай орлогшо, хэлэ бэшэгэй эрдэмэй дид-доктор Оюна Забанова «Буряад ТВ» телесубагай «Жэгүүртэ хүлэг» гэһэн дамжуулгада суута поэт Лопсон Тапхаевай намтар, уран зохёол тухайнь хөөрэбэ.
Бэлигтэй бэрхэ уран зохёолшо, Буряадай арадай ирагуу найрагша Лопсон Тапхаев эхэ дэлхэйнгээ хүрьһэ энэ болотор гэшхэжэ ябаа һаа, мүнөө жэл 85 наһанайнгаа ойн баяр угтаха һэн.
Зохёолнуудыень шэнжэлжэ, «Пространство и время в поэзии Лопсона Тапхаева» гэһэн ном хэблүүлһэн Оюна Забанова шэнжэлхы ажалнуудайнгаа нэгэндэ: «Буряадай арадай поэт, Буряадай ба Россиин Федерациин соёлой габьяата хүдэлмэрилэгшэ, Буряадай комсомолой ба Оросой Холбоото Уласай Уран зохёолшодой холбооной шангай лауреат, Хани барисаанай орденой кавалер гэһэн үндэр нэрэ зэргэдэ хүртэhэн Лопсон Дунзынович үнэн дээрэ түбшэн зантай, үнэншэмэ сэхэ байhаараа олондо hанагдаhаар», — гэжэ тэмдэглэһэн юм.
XX зуун жэлэй 60-аад онуудаар түрэл буряад уран зохёолдоо нэрэеэ нэрлүүлэн ороhон Лопсон Тапхаев сагай байдалай хубилалтануудые бэеэрээ мэдэрhэн хадаа, юрын хүнэй hанал бодол, баяр зоболон, уйдхар гашуудалые, этигэл найдабариие зохёолнууд соогоо тон үнэншэмөөр харуулжа шадаhан поэт гээшэ. Шүлэгүүдэйнь онсо шэнжэ, зүүн зүгэй хүнэй сэдьхэл, өөрсэ уянга, гүн ухаанай бодолнууд тухайнь «Буряад ТВ» телесубагай тус дамжуулга дотор хэлэгдэнэ.
Лопсон Тапхаевай 85 жэлэй ойдо зорюулагдаһан «Жэгүүртэ хүлэг» дамжуулга https://vk.com/wall-211498616_24525 зүйлөөр эшэ татажа харахада болохо.
