«Бэлиг» түбэй захирал Баир Балданов Улаан-Үдэ хотын захиргаанай Болбосоролой талаар хорооной урилгаар Буряад хэлэнэй үдэртэ зорюулагдажа,ниислэлэй 32-дохи дунда һургуулида үнгэргэгдэһэн баяр ёһололой тоглолтодо хабаадаба.
Ниислэл хотын болбосоролой һалбарида жэл бүри Буряад хэлэнэй габшагай һара соносхогдожо, хотын һургуулинууд болон сэсэрлигүүдтэ эдэбхитэй ехэ ажал ябуулагдадаг юм. Мүнөөшье жэл мүн лэ олон тоото хэмжээ ябуулганууд үнгэргэгдөө.
Сугларагшадые амаршалан, үгэ хэлэхэдээ, Баир Балданов шабинарта хандажа, түрэл хэлэнэй үндэр үүргэ, тэрэнэй баялиг тухай тэмдэглээ. Багшанар болон хүмүүжүүлэгшэдтэ баяр хүргөө.
Мүн тиихэдэ һая боложо үнгэрһэн буряад хэлэнэй комиссиин зүблөөн дээрэ Буряад Уласай Толгойлогшо Алексей Цыденовэй абаһан шиидхэбэринүүд тухай тодорхойлон хэлэһэн байха юм.
Тоглолтын түгэсхэлдэ эрхимэй эрхимүүдтэ шангууд ба шагналнууд барюулагдаа. Энэ ёһолол үнгэргэлсөөд, үгэх хэлэхэдээ, «Бэлиг» түбэй захирал иигэжэ хэлээ:
— Агууехэ гүрэнэйнгөө баруун хилэ дээрэ элдэб олон үндэһэ яһатанай түлөөлэгшэд болохо баатар сэрэгшэднай Эхэ оронойнгоо түлөө ами наһаяа гамнагүй тэмсэжэ ябанад. Дайшалхы энэ хэрэгтэнь түрэл хэлэнүүдынь туһална. Мүн тиихэдэ эндээ, нютагтаа, түрэл һайхан буряад хэлэеэ хүгжөөхэ, үхибүүдээ һургаха ажалаа мүн лэ эбтэй эетэйгээр ябуулжа байһан таанарта, хүндэтэ багшанар болон хүмүүжүүлэгшэд, үнэн зүрхэнэй баяр хүргэнэб!
