Доржи Банзаровай нэрэмжэтэ Буряадай гүрэнэй ехэ һургуули дүүргэгшэдтэ дээдэ мэргэжэл олоһон тухай баталамжа дансануудые барюулгын үсэгэлдэр үнгэргэгдэһэн ёһололдо «Бэлиг» түбэй захирал Баир Балданов хабаадаа.
БГУ-гай Түүхын болон хэлэ бэшэгэй дээдэ һургуулиин бүридэлдэ буряад хэлэнэй шэглэлээр һуралсалаа түгэсхэһэн залуу мэргэжэлтэдэй олониинь «Буряад Уласта буряад хэлэ сахин хүгжөөлгэ» гэһэн Гүрэнэй программаар һомологдоһон һангай мүнгэн дэмжэлгээр һуража гараа. Тиин, табан жэлэй саада тээ табигдаһан хэлсээнэй ёһоор, тэдэнэр уласай аймагуудай, ниислэл хотын һургуулинуудта багшалхаяа ошохо болоно.
Болбосоролой болон эрдэм ухаанай сайд Валерий Поздняковой даабаряар, мүн тиихэдэ Улас түрын «Бэлиг» түбэй зүгһөө залуу мэргэжэлтэдые амаршалхадаа:
— Буряад хэлэ сахин хүгжөөхэ талаар горитой ажал засагай зүгһөө хэгдэнэ, гүрэнэй программа бэелүүлэгдэнэ гээшэ. Һургуулинуудта түрэлхи хэлэ зааха багшанарай дуталдаһан дээрэһээ таанарые, залуу мэргэжэлтэдые, тэдэнэр үүдээ сэлин хүлеэжэ байна, — гээд Баир Балданов онсолон тэмдэглээ.
Ехэ һургуулиин эмхидхэһэн ёһололдо Түүхын болон хэлэ бэшэгэй дээдэ һургуули дүүргэһэн дүн хамта 151 залуу мэргэжэлтэдтэ дипломууд барюулагдаа, тэдэнэй 40 гараниинь — онсо шалгарһанай тэмдэгтэй.
