Улас түрын «Бэлиг» түбтэ Буряадай мэдээжэ уран зохёолшо Эрдэни Дугаровай үхибүүдтэ зорюулагдаһан «Жалсан Жаргалмаа хоёр. Хөөрөөнүүд» гэһэн ном хэблэгдэн гараа.
Эхэ орон, хүлөө шоройдожо үндыhэн тоонто нютаг, түрэлхи хэлэн, һуралсал, арадай ёһо заншал, гэр бүлэ, нүхэд, амитад, шубууд тухай хөөрөөнүүд энэ номдо оронхой.
Автор эдэнээ оньһон үгэ, һургаал, ёһо заншалай зүйлнүүдые хэрэглэн найруулһан байна. Тиимэһээ эдиршүүлые хүмүүжүүлгэдэ, тэдэнэй болбосоролдо тон ехэ удха шанартай.
Хөөрөөнүүд хэмжүүрээрээ ехэ бэшэшье һаа, гүнзэгы удхатай. Үхибүүдэй абари зан, балшар наһанайнь хаһа, ухаан бодолойнь хүгжэлтэдэ таарама, өөһэдынь нюдөөр хаража, сэдьхэл зүрхыень хүдэлгэхэ хүсэлтэйгөөр зохёогдоһон.
Гэртэхинтэеэ хамта тус хөөрөөнүүдые уншажа, багашуулай сүлөө сагаа һонирхолтойгоор үнгэргэхэнь лабтай. Һурагшадайшье уншахада таатай зохид байха.
Энээхэн ном уран зурааша Семён Суворовой һайхан зурагуудаар шэмэглэгдэнхэй хадаа уншагшадай анхарал заатагүй татаха гэжэ бодогдоно.
Хөөрөөнүүдэй согсолбори үхибүүдтэ, hурагшадта зорюулагдаһан ушарһаа Буряад Уласай Болбосоролой болон эрдэм ухаанай яаманай баталһан түсэбөөр сахим хэбынь Улас түрын «Бэлиг» түбтэ эхинһээ эсэстээ хүрэтэр бэлдэгдэһэн юм.
«Буряад Уласта буряад хэлэ сахин хүгжөөлгэ» гэһэн Гүрэнэй программада һомологдоһон мүнгөөр тус ном барлагдаба гээд тэмдэглэлтэй. Болбосоролой эмхи зургаануудаар тараагдаха.
