Эрхүү можын Усть-Ордагай Буряадай тойрогой Оһын аймагай Дүүмын һунгамалнуудаар һунгагдаһан Виктор Мантыков, Александр Дамбуев, Эдуард Задоров, Андрей Сергеев, Валентина Хартанова гэгшэдтэ Улас түрын «Бэлиг» түбэй захирал Баир Балданов амаршалгын бэшэгүүдые эльгээбэ.
Үнгэрэгшэ амаралтада, сентябриин 8-да, гүрэн дотор тогтоогдоһон һунгалтын ниитэ нэгэн үдэр Оһын аймагай Дүүмын гэшүүдэй һунгалта үнгэргэдөө гээд мэдээсэе. Түрэл хэлэнэйнгээ хүгжэлтын түлөө оролдон, горитой ехэ ажал ябуулжа байһан эрхим багшанарай, аймагай нютагай засагай зургаануудай тушаалтадай түрүү зэргэдэ ябаһан эдэ табан түлөөлэгшэд һунгагшадай диилэнхи олон дуугаар арадай һунгамалнууд болоһон байна.
- Арадай түлөөлэгшөөр һунгагдаһан Та үльгэр түүхэтэ буряад аймаг нютагайнгаа, түрэл арадайнгаа, түмэн жэлнүүдые һэтэлэн ерэһэн үндэһэн хэлэеэ сахин хүгжөөхэ ажалдаа бүри эршэтэйгээр ябаха аргатай болобот, — гээд «Бэлигэй» захиралай бэшэг дотор хэлэгдэнэ.
Баяр Балдановай һанамжаар, Оһын аймагай засаг дарга Виктор Мантыковай, Болбосоролой хүтэлбэриин дарга Александр Дамбуевай ударидалга доро буряад хэлэнэй багшанар, һургуулинуудай захиралнууд Эдуард Задоровой, Андрей Сергеевэй, Валентина Хартановагай тус тустаасэлеэн нютагуудтаа хүндэтэй байһыень, хэжэ ябаһан ажалайнь дүнгүүдэй зүбые арад зон үндэрөөр сэгнээ.
Дундаршагүй дүүрэн жаргал эдлэжэ, тодхор зоболон үзэнгүй, яларан толорон ябахыень аймагай һунгамалнуудта «Бэлиг» түбэй захирал хүсэн юрөөһэн байха юм.
